விடியல் வியப்புகள்

விடியல் வியப்புகள்

 

வசந்தங்கள் பூத்து வரிசை இடப் - பனி
வயிரங்கள் கோத்துத் தரிசைநட
அசைந்தெங்கும் நீள அவிநயமாம் - தென்றல்
அமரபூ பாளக் கவிநயமாம்

 

காலை அரும்புகள் கட்டியமாம் - அவை
காணச் சுரும்புகள் முட்டியும் ஆம்
கோல ரகசியம் கூறிடுமாம் - அதில்
கோடி அவசியம் தேறிடுமாம்

 

பொரிப்பொரிக் கிண்ணத்துப் பூச்சிகளாம் - அவை
பொடிப்பொடி வண்ணத்துக் காட்சிகளாம்
விரிப்பொடும் பூம்பொழில் விட்டில்களாம் - அந்த
வியப்புக்குக் காம்பெழில் கட்டில்களாம்

 

ஓடை அருவிகொள் உல்லாசம்தான் - அங்கே
ஒதுங்கும் குருவிகள் நல்வாசம்தான்
கூடை மலரும் கொலு எனலாம் - நிசிக்
கொத்தாய்ப் புலரும் நிலவெனலாம்

 

பின்னும் என்னென்ன பிதற்றல்களாம் - கிளிப்
பிள்ளைபோல் சொன்ன குதற்றல்களாம்
சொன்ன ஒவ்வொன்றும் புதுநலம்தான் - தெய்வ
சொர்க்கமாய் நின்ற குதூகலம்தான்