துளித் துளி - மழை

மழை

 

தூறினால் மழைதான்
மீறினால் பிழைதான்

 

இடைமழை நல்லதாம்
அடைமழை தொல்லைதாம்

 

முகிலொடு முகில்தான் - பின்
திகிலொடு திகில்தான்

 

சூறைக்குச் சொந்தம் - இடிப்
பாறைக்குச் சந்தம்

 

உயிர்களும் உண்ணும்
பயிர்களும் பண்ணும்

 

வானம் வழியும் - எனில்
ஈனம் ஒழியும்

 

நிலத்தை நிறைக்கும் - மக்கள்
நலத்தைப் பெருக்கும்

 

மண்ணின் வாசனை - மழை
பண்ணும் பூசனை

 

பஞ்சம் பசியும் - மழைக்(கு)
அஞ்சி மசியும்

 

மாரி இலையேல் - நலம்
பாரில் இலையே

 

பெய்யவும் இடரும் - பயன்
செய்யவும் தொடரும்

 

ஆற்றுக்கு நண்பன் - உழைச்
சேற்றுக்கு வம்பன்

 

கடலுக்கும் மகன்தான் - வயல்
திடலுக்கு மகான்தான்

 

உயிர்க்கும் வேண்டும் மழை
பயிர்க்கும் தூண்டும்

 

நிலத்துள் நீரின்றேல் - உயிர்க்
குலத்துள் யாரின்றே?