திருமணம்
சொர்க்கத்தில் உறுதி - நகை
ரொக்கத்தில் இறுதி
உடன்படுக் கைதான் - அதற்(கு)
உடன்படிக் கைதான்
வரன்கள் அடக்கம்
சவரன்கொள் தொடக்கம்
பாக்கிய வதிகள் - கடன்
பாக்கி யவதிகள்
வாரிசு யாகம் - அதைக்
கோரி,சை யோகம்
பிள்ளைப் பேறு - வயிறு
கொள்ளச் சோறு
சையோகச் சடங்கும் - கருப்
பையாகத் தொடங்கும்
குழந்தைத் தொழிலகம் - வர
எழுந்த எழிலகம்
கருவறைப் பாசனம் - சிசு
வரவைச்சொல் சாசனம்
கருப்பைக்கே வரவு - கூட
இரப்பைக்கே நிறைவு
புகலும் மணம்தான் - அதன்
நகலும்அம் மணம்தான்
விளக்கும் அணையுமே - உடன்
விளங்கும் அணையுமே
சரசமோ டுறவு - பல
விரசமோ டிரவு
உணர்ச்சிக்கே வேகம் - உடல்
புணர்ச்சிக்கே மோகம்
அணைப்புக்கே சட்டம் - அதன்
பிணைப்புக்கே திட்டம்
விவாகம் மையலால் - மனை
நிர்வாகம் தையலால்
பருவத்துப் பந்தல் - உடன்
உறவொத்துக் கந்தல்
கொடுக்கல் வாங்கல் - ஆண்பெண்
படுக்கைத் தாங்கல்
நடப்பதோ குடும்பம் - கூடக்
கொடுப்பதோ இன்பம்
கவர்ச்சியால் காதல் - அதன்
நுகர்ச்சியால் நோதல்
குடும்பத் தையல்தான் - இற்று
விடும்பல் மையல்தான்
அவதாரமாய் இருக்கும் - பின்
அவ தாரமாய் நெருக்கும்
விரிதலும் உறவுதான் - தொடர்
விரிசலும் பிறகுதான்
காமமேல் வேள்வி - பின்
சேமமேல் கேள்வி
கவர்ச்சிதான் முன்னால் - மனத்
தளர்ச்சிதான் பின்னால்
தொடர்கதைத் தூண்டில் - பின்
இடர்வதைக் கூண்டில்
அடையுமுன் வேகம் - பின்
விடையுமே சோகம்
தாம்பத்யம் ஏற்கும் - பின்
தாம்பத்யம் நோக்கும்
அடங்கினால் சம்பந்தம் - மனம்
முடங்கினால் நிர்ப்பந்தம்
கோட்டைக்கு வேட்கை - அதே
கோட்டைபின் ஓட்டை
பந்த நாட்டம் - உடன்
விந்தை ஆட்டம்
இல்அறம் சிலர்சிலர் - அது
இல்லாஅறம் பலர் பலர்
No comments:
Post a Comment